حتى لا نكون (إِذاً مِّثْلُهُمْ)

بستعجب جداً من الطريقة اللي ممكن أي حد فينا يتعامل بيها مع الكلام الفارغ* اللي نادراً ما بقيت أسمع حاجة غيره في كل أنواع الإعلام ، و على رأسها برامج (التوك شو) في الفضائيات. مبدئياً لازم أوضح إن في قلة قليلة من الإعلاميين المحترمين ، و دول كلامي مش عليهم ، الكلام يخص باقي الأغلبية من إخواننا الإعلاميين هدانا الله و إياهم.

المسئولية الإعلامية مسئولية مشتركة ، يعني مش كفاية يبقى في إعلاميين محترمين بيقدموا حاجة عليها القيمة ، لازم كمان يكون في جمهور واعي بيعرف يقيِّم المحتوى اللي بيسمعه أو بيشوفه ليل و نهار ، لأنه ببساطة بيتحول بعد كده لمُسَلَّمات غير قالة للنقاش عند كتير مننا + إنه بيبقى مادة خصبة جداً لنقاشات مع أي/كل حد سواء نعرفه/منعرفوش.

يبقى لما نتكلم عن برنامج تليفزيوني بيطلع فيه أ.فلان/فلانة -من وجهة نظري- مش هيختلف كتير عن فيديو أي واحد مننا ممكن يرفعه على (الفيسبوك) أو (اليوتيوب) ، يمكن عشان محدش عنده علم يقيني مين فيهم هيِتشاف أكتر ، و تأثيره هيكون أوسع.

يمكن موضوع التواصل و إمكانية وضع التعليق/الانطباع ده بيخليني مطمّن شوية إن الموضوع لو على النت هيبقى فيه خُد و هات ... و ممكن تقرا تعليق فيه نفس اللي إنت عايز تقوله ، على عكس التليفزيون اللي مبيقدرش يوفر نفس القدر من التفاعل مع المادة الإعلامية المُقَدَّمّة

عشان كده ردود الفعل على البرامج التليفزيونية بتنحصر -عادةً- في مجرد نقاشات و نقد -غير موضوعي غالباً- في أوضه مقفولة ، أو حتى على قهوة ، بس مبيقدرش يخترق الشاشة و يوصل للسيد(ة) الإعلامي(ة)  الفاضل(ة) ... و بيفضل كل واحد عايش في جزيرة منعزلة ، بيقول اللي هو عايزه ، و بيسمع اللي هو عايزه ، حتى لو كان مش عايزه ...... تيجي إزاي دي ؟؟؟

يعني مثلاً تسمع إن في حد بيهاجم أ.فلان ، تقوم تفتح (التليفزيون/اليوتيوب/...إلخ) و إنت فضولك بيدفعك تعرف إيه اللي بيتقال عليه ، تقوم تسمع كلام ميعجبكش -لأن مستحيل كل الكلام يعجبك زي ما اتفقنا قبل كده- و في نفس الوقت متقدرش ترد على الكلام ده ، كبيرك تكتب تعليق ، أو حتى ممكن ينحصر كل دورك في
Like/Dislike
إلا إذا كنت إيجابي لدرجة إنك تعمل صفحة لمقاطعة البرنامج الفلاني ، و الناتج ببساطة -غالباً- بيكون:
- شهرة أكتر
- نسبة متابعة أعلى
- تقرير للكلام -اللي هو أصلاً مش عاجبك- عند الناس
و ده بيخليني أسأل نفسي و أسألك بهدوء ... هو إنت كده ساعدت بجد في الدفاع عن أ.فلان الغلبان اللي ميستاهلش كل اللي بيتقال عليه ده ، ولا -بدون قصد- عملت دعاية و تثبيت للكلام ده عنه ؟


خليني صريح معاك .. إنت أخويا و حبيبي ، و أنا يهمني مصلحتك قبل أي حد ، و يهمني طبعاً إن محدش يتقال عليه حاجة كدب

الطريقة اللي أنا و إنت بنتعامل بيها في الموضوع ده غالباً بتبقى شكلها الظاهري دفاع عن أ.فلان ، بس في حقيقة الأمر ما هي إلا أسلوب دعاية غير مباشر للشائعات ضده ، و بعد ما بتطلع الشائعة من شبه المستحيل أن تزيل آثارها و لو عملت المعجزات ... عشان كده -و اعتبر دي نصيحة من أخوك- أنا بقول إحنا محتاجين نراجع طريقة تعاملنا مع المنظومة الإعلامية بصفة عامة في ضوء بعض الاعتبارات البسيطة ... اللي ممكن نعتبرها ميثاق الشرف الإعلامي (الشخصي) .. حتى لو محدش هيلتزم بيه غير إحنا الاتنين
 

• كان ابن عمر رضي الله عنهما يقول "رحم الله أقواما أحيوا الحق بذكره ، وأماتوا الباطل بهجره".
• [يَا أَيُّهَا الَّذِينَ آمَنُوا إِن جَاءكُمْ فَاسِقٌ بِنَبَأٍ فَتَبَيَّنُوا أَن تُصِيبُوا قَوْماً بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ ] (الحجرات :6)
• [ وَقَدْ نَزَّلَ عَلَيْكُمْ فِي الْكِتَابِ أَنْ إِذَا سَمِعْتُمْ آيَاتِ اللّهِ يُكَفَرُ بِهَا وَيُسْتَهْزَأُ بِهَا فَلاَ تَقْعُدُواْ مَعَهُمْ حَتَّى يَخُوضُواْ فِي حَدِيثٍ غَيْرِهِ إِنَّكُمْ إِذاً مِّثْلُهُمْ إِنَّ اللّهَ جَامِعُ الْمُنَافِقِينَ وَالْكَافِرِينَ فِي جَهَنَّمَ جَمِيعا ً [(النساء 140)

::كلمة على الهامش.::حاول تقرا الكلمتين دول ... كتبهم( ستيفن كوفي)  بعنوان 

Discover the 90/10 Principle

.. ممكن تفهم أنا قصدي إيه
.. يا ريت اللي قرا الكلام ده يعرفني إيه انطباعه ، أو هو استفاد منه حاجة ولا لأ ..

و معلش بقى .. أنا كنت متعصب شويتين عشان موقف حصل كده في البيت ، و بدل ما أتنرفز بقى أو أكتم في نفسي ، قلت أفضفض معاك شوية ، يمكن عندك توجيه أو رأي كويس أو فكرة مبتكرة تساعدنا في الحوار ده كله :)

ملاحظة مهمة بقى ... الكلام ده كله كده من وحي خيال سعادتي ... و أتمنى متبخلش عليا بالنصيحة و النقد
__________________________________

*الكلام الفارغ: المقصود بيها أي هجوم و إساءة على أشخاص أو مجموعات ، أو أي أفكار هدامة أو شاذة يتم طرحها بهدف إحداث ضجة إعلامية و تلميع أو تدمير سمعة